|
Die Vielfalt vun ännre Kokosnuß Exodisches Obschd gibd´s jo schun in jedem Supermarkt. Des isch jo uff de ände Seit ziemlisch Kacke. Eiheimisches Obschd unn Gemies sterbd immer mehr aus. Kaum änner kennd noch so Sache wie Mangold, Wirsing, Quidde, awwer ä Grapefruit odda ä Kokosnuß kennd jedie Sau! Annrer Seids hot´s awwer ach sei Gudes. Ä Kokosnuß zum Beispiel isch ä extrem vielseidisches Ding. Die kann ma vollkommen verwerde. Ä Banan isch nät so gud, do muß ma jedesmol die Schal fortschmeiße. Aus ännre Kokosnuß-Schal kama Blumetepp, Blumevase, Wasserpeiffe, Cocktailgläser odda Ohrwurmbehausunge fer de Gaade baschdle. ´S Kokosfläsch kama zum Koche odda zum Backe nemme unn die Milch kama drinke. Jetz versuch mol aus änre Gelerieb än Blumetopp zu mache, odda aus änre Grumbeer ä Cocktailglas. Des Bleede isch hald bloß, daß ma in de Palz kä Kokosniß produziere kann!! Do isch´s jo kä Wunner, wenn´s immer wennischer Baure gibt! Awwer fer was braucht man heit a noch Baure? ´S gibt jo alles im Supermarkt. Do sinn dann zwar lauder E-Stoffe drin, awwer fer des hald sisch des jo ach alles viel länger. Unn im Aldi isch´s sogar billisch! Fortsetzung folgt!!! Bis ball, de Inger |