Hotels baue heeßt Maulwirf quäle, behaupt isch jetz äfach mol so! Awwer des hot nadierlisch ach sein Grund! Des isch nämlisch so: Wenn äner in Ischgl, odda schunschd irschendwu do unne, ä Hotel baut, dann machda des deshalb, weila Geld verdiene will. Do isch jo ach nix degesche zu sache. Unn weila Geld verdiene will, sachda dene Leit vun de Reisebüros, wu sei Hotel steht. Also gehen die Leit, wenn se in Urlaub fahre wollen, ins Reisebüro unn gucken wu dann jetz iwweral Hotels stehn. Dann krischen se des mit, daß de ähnde do unne in Ischgl odda wu, ä Hotel gebaut hot unn denken: "Jo, Alla hopp! Dann fahre ma hald mol noch Ischgl odda so, do lischd jo ach immer än Haufe Schnee!" Also packen die ehr Schi ei unn fahren do nunner. Irschendwann fahren se dann widda häm, unn die negschde Urlauwer kummen. So geht des dann ä ganzi Weil. Des Dabbische isch bloß, daß des jedes Johr mehr Leit werren, weil jeder hämkummt unn seine ganze Clique verzehlt, wie schä´s doch in Ischgl odda wu isch, unn daß ma dort äfach mol gewesd sei muß. Also fahrn se all do nunner, weil ma dort so schä Schifahre kann. Jetz langt awwer irschendwann de Platz nimmi, fer die ganze Schifahrer, weil die jetz so viel sinn, daß se sisch bloß noch gescheseidisch uff de Fieß (odda uff de Schi) rumdabben. Also sachd irschend ebber: "Ah, horsch! Des isch doch halb so schlimm, do mache ma hald ä paar Bääm um, do stehn jo genuch rum. Dann hämma widda all Platz zum Schifahre!" Die annre Leit sinn vun dere Idee nadierlisch begeischtert, also stelle se sisch hie, unn machen ä paar Bääm um. So geht des dann ä paar Johr wieder, bis se uff ämol merken, daß se jo gar kä Bääm mä hän, unn daß des jo alles gar nimmie schä isch. Deshalb gehen do irschendwann ach kä Urlauwer mä hie. Unn dann häma de Salat: Iwwerall sinn Hotels, awwer kä Sau isch drin. Die Landschft isch versaut, unn Bääm gibt's ach käni mä. Awwer´s aller schlimmschde sinn die Lawine! Wann´s jetz im Winter mol schneit, (unn dort schneit´s jo immer im Winter, des isch jo nät so wie bei uns,) dann hängt der ganze Schnee do am Hang, wu frieher die Urlauwer Schi g´fahre sinn! Weil do awwer jetz kä Bääm mä stehn, rutscht des alles runner, begrabt ä paar Haiser unner sisch unn sammelt sisch dann unne im Tal. Jetz isch´s awwer im Tal viel wärmer, als owwe uff em Bersch, unn deshalb schmelzt der ganze Schnee viel schneller als normal. Unn wenn der Schnee dann schmelzt, dann werda jo zu Wasser. Unn des Wasser muß jo ach irschendwu hie. Also laafd´s hald in de Fluß, unn wie des die Fliß so an sisch hän, laafen se jo immer in än greßere Fluß nei. Unn dann laafen se in de Rhei. Des gibt dann nadierlisch Hochwasser, des isch jo klar! Unn jetz war jo grad so ä Lawin gewest, do unne in Ischgl. Do bin isch dann mol ä paar Daach späder mit meine Freundin in Speyer im Domgaarde spaziere gange, unn hab was unglaublisches feschtstelle gemißd: Wann´s in Ischgl odda wu ä Lawin gebt, dann flüchden die Maulwirf bei uns noch Westen! Weil des isch jo so: De Rhei, der laafd jo ach an Speyer vorbei. Wann de Rhei jetz Hochwasser krischd, dann steigt jo ach de Grundwasserschbischel, bisses Grundwasser so hoch isch, wie der Rhei. Des fangt jo im Oschde a, weil de Rhei jo Ösdlisch vun Speyer lischd. Also lischen do die Maulwirf gemiedlisch in ehrm Tunnel rum, unn ruhn sisch aus, unn uff emol fangt de Grundwasserschbischel a zu steige. Dann missen die jo abhaue, die arme Viecher. Also flüchden se noch Weschde. Unn des muß ma sisch mol vorstelle, was des fer so än Maulwurf heeßt, wann er noch Weschde flüchde muß! Die arme Viecher sinn jo blind!!! Unn deshalb find isch des ä Riese-Sauerei, wenn die Leit immer määnen, sie mißden ubedingt im Urlaub widda noch Ischgl! Isch erklär eisch bal noch mehr so Dinger! Schluß fer heit, bis dann, de Inger.

zurück